Kulis.Az Kübra Əliyarlının “Ən qısa hekayə” müsabiqəsinə göndərdiyi “Allaha deyəcəyəm” (351 işarə) hekayəsini təqdim edir.
Soyuq qış ayı idi. Hər tərəfdə şaxta, qar, çovğun...
Bir tərəfdə insanlar öz peyğəmbərlərinin dünyaya gəldiyi günə təmtəraqla hazırlaşır, digər bir tərəfdə isə dünyaya gəlişini böyük sevinclə qeyd etdikləri peyğəmbərə böyük xəyanət edilirdi. Belə ki, günahsız insanların qanı durmadan axıdılırdı. Belə bir vəhşət dolu məkanda 3 yaşlı körpənin öldürülmədən öncə söylədiyi son söz:
- Dayanın Allaha deyəcəyəm!
