“Nirvana” rok qrupunun yaradıcısı mərhum Kurt Kobeynin akustik gitarası ABŞ-da 1 milyon dollar civarında hərraca çıxarılıb.
Kulis.az xarici mediaya istinadən xəbər verir ki, bu barədə “Julien's Auctions” hərrac evi öz saytında yazıb.
Məlumatda qeyd olunub ki, “Julien’s Auctions” hərrac evi Kurt Kobeynin 1959-cu il istehsalı olan “Martin D-18E” akustik gitarasını təqdim etdiyi üçün qürur hissi keçirir. Beverli-Hillsda onlayn şəklində keçiriləcək lot hərrac evi üçün ən mötəbər hadisələrdən biri sayılır.
Qeyd edək ki, satışa çıxarılan gitara 1993-cü ilin noyabrın 18-də Kurt Kobeynin “MTV Unplugged” konsertində istifadə etdiyi gitarasıdır. Sözü gedən konsert ifaçının müəmmalı ölümündən beş ay əvvəl baş verib. Konsertin video və audioversiyası 1994-cü ildə artıq K.Kobeynin ölümündən sonra buraxılıb. Bu “Nirvana”nın ən məşhur səsyazması hesab olunur. Sonradan “Unplugged in New York” adı altında çıxan bu albom 1996-cı ildə Amerikanın “Grammy” mükafatlandırılmasında “Ən yaxşı alternativ albom” nominasiyasını qazanıb.
