"Məni əsəbiləşdirən insanların tərbiyəsizliyi və qabalığıdır. İncəsənət xadimiyəm və hər şeyin səliqəli, gözəl formasını sevirəm. Bu sənət nifrətdən yox, məhəbbətdən doğur. İşimiz sevgini və məhəbbəti çoxaltmaqdır. Bu yolda hansısa qeyri nəcib hərəkət edən insanı görəndə özümdən çıxıram. Çünki bu sənətin adı “incəsənətdir”. Burada davranış da incə olmalıdır. Burada hər bir tamaşaçıya və mövzuya incə yanaşmalısan. Mənə mane olan o insanların içindəki yaxşı ilə pisin tarazlığı tapmamaqlarıdır”.
Kulis.az xəbər verir ki, bu sözləri Xalq artisti Faiq Ağayev qonaq olduğu “Yaşananlar” verilişində deyib. Müğənni sosial şəbəkədə yazılan tənqidlərdən bəhs edib:
"Qeyri-nəciblik və tərbiyəsizliklə sosial şəbəkələrdə rastlaşıram. Çünki insan ən böyük cinayətləri və tərbiyəsizlikləri o halda edir ki, cəzasızlıq olsun. Sosial şəbəkədə kimin ağlına nə gəldisə, onu da yazacaq. Çünki bilir ki, cəzasızdır. Hansısa sənət adamı məhkəməyə vaxt itirməyəcək. O, yalnız bıçaq sümüyə dirənəndə məhkəməyə müraciət edir. O vəziyyətə də gəlib çıxmırıq ki, hansısa yolunu azan və bilməyən insanı qandırmaq üçün məhkəməyə müraciət edək. Məhkəmədə keçirdiyim vaxtı səsyazma studiyasında, televiziyada, solo konsertdə keçirərəm. Cəzasızlıq əksər hallarda o insanları ilhamlandırır ki, mən dediyimi deyə bilərəm. Amma düşünmürlər ki, bir qarğa ilə səma çirkinləşə bilmir. Səma elə səmadır".
Axşam.az
