Gənc yazıçı Ömər Xəyyam (Xəyyam Mazanov) Prezident İlham Əliyevin müvafiq sərəncamı ilə gənc yazarlar üçün nəzərdə tutulan təqaüdə layiq görülüb.
Xatırladaq ki, Mazanov Xəyyam Ramazan oğlu ( Ömər Xəyyam) 1989-cu il noyabrın 10-da İsmayıllı rayonunun Cülyan kəndində anadan olub. 2008–2009-cu illərdə müddətli həqiqi hərbi xidmətdə olub. Ailəlidir. Xəyyam Mazanov 1996–2004-cü illərdə İsmayıllı rayonu Cülyan kənd tam orta məktəbində, 2004–2007-ci illərdə İsmayıllı rayonu 5 saylı tam orta məktəbində təhsil alıb.
O, 2013-cü ildən Ömər Xəyyam imzasıyla mətbuatda dərc olunmağa başlayıb. 100-dən çox publisitik məqalə, hekayə və tərcümə materiallarının müəllifidir.
Azərbaycan Yaradıcılıq Fondunun kitab seriyasında "Sayrışan hallar" adlı hekayələr kitabı nəşr edilib.
Qeyd edək ki, Ömər Xəyyam 2017-ci ildən Azərbaycan Yazıçılar Birliyinin üzvüdür.
