Qarabağ həqiqətləri haqqında film çəkilir.
Kulis.az xəbər verir ki, şəhidlərə həsr olunan film kənddə yaşayan iki dostun müharibəyə getməsi və onlardan birinin şəhid olması haqqındadır.
Filmdə şəhid son nəfəsində dostundan xahiş edir ki, ölümünü anasından gizli saxlasın. Ancaq sonda sağ qalan dost, baş verən hadisəni şəhidin anasına açıqlayır. Nəticədə şəhid anası bu vəziyyəti qəbul edir, ana kimi məğrur duruşunu itirmir, öz hisslərinə hakim olur və şəhidliyin uca zirvə olduğunu başa düşür.
Qeyd edək ki, “Ana” filmi Xalq yazıçısı Gülhüseyn Hüseynoğlunun hekayəsinin motivləri əsasında ekranlaşdırılır. Filmin ssenari müəllifi İlqar Fəhmi, quruluşçu rejissoru Vüsal Məmmədov, rejissoru Vüsalə Tağı, operatoru Mehdi Yaqubovdur.
Filmdə İlqar Musayev, Firəngiz Babayeva, Gülər Nəbiyeva və Mirhüseyn Yaqubov və digər aktyorlar oynayırlar. Filmin çəkilişləri Xızı rayonunun Altıağac qəsəbəsində aparılır.
