Oktyabrın 7-də X Bakı Beynəlxalq Kitab Sərgisi çərçivəsində Azərbaycan Yazıçılar Birliyinin katibi şair- tərcüməçi Səlim Babullaoğlu ilə oxucular arasında görüş və imza saatı keçirilib.
Kulis.az xəbər verir ki, tədbirdə o, şeirlərini səsləndirib, oxucularla geniş fikir mübadiləsi aparıb. Səlim Babullaoğlu öz əsərlərində ədəbi irsimizin qorunub saxlanılması və onun müasir dövrdə yenidən dəyərləndirilməsi haqqında düşüncələrini bölüşüb və iştirakçıların suallarını cavablandırıb.
Vurğulanıb ki, Səlim Babullaoğlu Azərbaycan ədəbiyyatında özünəməxsus yer tutan qələm sahibidir və onun əsərləri oxucular tərəfindən maraqla qarşılanır. Qeyd olunub ki, sərgi çərçivəsində keçirilən bu cür tədbirlər oxucuların yazıçılarla birbaşa ünsiyyət qurmasına, ədəbi mühitlə daha yaxın tanış olmasına şərait yaradır. Xüsusilə gənc oxucuların belə görüşlərdə iştirak etməsi onların ədəbiyyata marağını artırır və yaradıcı şəxslərlə əlaqələrini gücləndirir. Həmçinin vurğulanıb ki, belə tədbirlər Azərbaycan mədəniyyətinin inkişafı və milli ədəbiyyatın təbliği baxımından da böyük əhəmiyyət daşıyır.
Görüşün sonunda müəllif gələcək layihələri, yeni əsərləri barədə danışıb və kitablarını oxucular üçün imzalayıb.
