Martın 4-də Azərbaycan Teatr Xadimləri İttifaqında fəaliyyət göstərən laboratoriyaların “Baxış - 4” festivalının açılışı olub.
Kulis.az xəbər verir ki, açılış mərasimində Teatr Xadimləri İttifaqının sədri vəzifəsini icra edən Xalq artisti Hacı İsmayılov festivalın əhəmiyyətindən danışıb.
“Festivalın keçirilməsində məqsəd laboratoriyalarda məşğul olan gənclərin mənimsədikləri bilik və bacarıqları nümayiş etdirmək, onları yeni axtarışlara ruhlandırmaqdır. Eyni zamanda, teatr məkanında baş verən yaradıcılıq proseslərini fəallaşdırmaq əsas prinsiplərdəndir. Budəfəki festivalda, demək olar, iştirakçıların böyük əksəriyyəti digər sahələrdə fəaliyyət göstərən teatrsevərlərdir”, - deyə əlavə olunub.
Sonra “Gözəllik kraliçası” adlı tamaşa nümayiş olunub.
Quruluşçu rejissoru Könül Şahbazova olan səhnə əsərində rolları Gülər Ləzgiyeva, Sovqat Səmədova, Mehman Piriyev və Toğrul İsabəyli ifa edib. Tamaşanın musiqi tərtibatı Qurban Əhmədova məxsusdur.
