Hindistanın Azərbaycandakı səfirliyi Qobustan Milli Tarixi-Bədii Qoruğu ilə birlikdə Hindistan abidələri və irs məkanlarını Qobustanda nümayiş etdirəcək Hindistan qalereyasının açılışı münasibətilə tədbir təşkil edib.
Kulis.az xəbər verir ki, Səfirlikdən verilən məlumata görə, sərgi Hindistanın müstəqilliyinin 75 illiyinin qeyd olunması tədbirləri silsiləsinə daxildir.
Tədbirdə çıxış edən Hindistanın ölkəmizdəki səfiri Bavitlunq Vanlalvavna səfiri Qobustanın Hindistanın ən məşhur tarixi abidə və məkanlarının bəzilərinin nümayiş olunduğu 16 şəkil plakatından ibarət sərgi üçün çox uyğun bir məkan olduğunu bildirib. Səfir sərginin məşhur Tac Mahal, Qırmızı Qala və Cənubi Hindistanın məbədləri və s. kimi məkanları əhatə etdiyini və Qobustan kimi bu abidələr və məkanların da Hindistanın UNESCO-nun Ümumdünya İrs Siyahısına daxil edilmiş 40 məkanı sırasında olduğunu vurğulayıb.
Diplomat həmçinin sərginin Hindistanın zəngin mədəni irsini Qobustana gələn qonaqlara təqdim edəcəyini və ölkələrimiz arasında mövcud olan ortaq zəngin mədəni irsimiz arasında bağlantı rolunu oynayacağını bildirib.
Hindistanın müstəqilliyinin 75 illiyi münasibətilə təşkil olunan tədbirlər haqqında məlumat verən səfir Bavitlunq Vanlalvavna deyib: “Hindistanın 2022-ci il avqustun 15-də müstəqilliyinin 75 ili tamam olacaq və bu ilin mart ayından etibarən bu önəmli tarixi hadisənin qeyd olunması münasibətilə 2023-cü ilin avqust ayına qədər daha iki il müddətində davam edəcək tədbirlər silsiləsinə start veriləcək”.
Səfir ötən illər ərzində Hindistanın dünyanın iqtisadi inkişafına əhəmiyyətli şəkildə töhfə verdiyini diqqətə çatdırıb və bildirib ki, ölkəsinin kənd təsərrüfatı sektorunda əldə etdiyi əhəmiyyətli inkişaf, əczaçılıq və informasiya texnologiyaları sektoru da daxil olmaqla elm və texnologiya sahəsində irəliləyişi Azərbaycan da daxil olmaqla dünya dövlətləri tərəfindən müsbət qarşılanır. O, Hindistanın dünya ölkələrində sayı 30 milyondan çox olan diaspora nümayəndələrinin bir çox sahələrdə uğurlar əldə etdiyini və yaşadıqları cəmiyyətə müsbət töhfələr verdiyini söyləyib.
azertag.az
