Atatürk Mərkəzində İsa Hüseynovun (Muğanna) “İdeal”, “Məşhər”, “İsahəq, Musahəq”, “Qəbiristan”, “Cəhənnəm” və “GurÜn” əsərlərinin təqdimatı keçirilib.
Hədəf Nəşrlərinin yazıçının 85 illik yubileyi ilə əlaqədar nəşr etdirdiyi kitabların təqdimatında Anar, Nizami Cəfərov, Fikrət Qoca, Zəlimxan Yaqub, Tağı Əhmədov və oxucular iştirak edib. Kulis.Az-ın verdiyi məlumatda belə deyilir.
Tədbirdə çıxış edən İ. Hüseynov səhhətində yaranmış problemə görə yazıçılarla, oxucularla görüşə bilmədiyini söylədi: “Çox təəssüf olsun ki, xəstəliyim ziyalılarla, oxucularla görüşməyimə imkan vermir”.
Kitab dükanlarının azlığından şikayət edən xalq yazıçısı nəşriyyatların hazırda pullu adamları çap etməsini də qeyd etdi: “Dövr dəyişəndən sonra mətbəələrdə şairə adlanan qızlarin cızma-qaraları çap olunmağa başladı. Yazıçıdan isə kitabının çap olunması üçün pul tələb edirlər”.
Azərbaycan Yazıçılar Birliyinin sədri, xalq yazıçısı Anar İ. Hüseynovu 60-cılar nəslinin ustadı adlandırdı: “ Biz hər zaman İsa Hüseynova minnətdarıq. O, qəribə dünyada yaşayan bənzərsiz yazıçıdır. Yazıçı gərək yazdığına inansın, inandığını da yazsın. İsa Hüseynov da məhz belə yazıçılardandır”.
Xalq şairi Zəlimxan Yaqub isə İ. Hüseynovun indi də 25 yaşında olduğu kimi düşündüyünü, Azərbaycan Sovet ədəbiyyatınn yönünü dəyişdirdiyini bildirdi.
